Isá Moósir zormor baabute agun hotá 26 Só mac soledde ottót, Allaye Jibrail fíristare Galilor Nasárat namor ekkán cóorot eggúa abiyáta maiya fuar héçe difeçáiye,
27 zibár zuragatá Dawudor fissánor Yusúf name ek zon manúic lói óoil, hé abiyáta maiya fuar nam accíl Moriyam.
28 Fíristaye híbar héçe aái hoódde, “Tuáñr uore cánti óuk, Malike tuáñre bicí rahámot goijjé, Íba tuáñr fúañti asé.”
29 Moriyame yían fúni ebbe súharáiya óigiyoi, ar ibá hondila sólam hoói báfer.30 Fíristaye híbare hoódde, “Óu Moriyam, no dhoraiyó, kiyólla-hoilé tuáñr uore Allar rahámot óiye.31 Fúno, tuñí hámil óiba edde tuáñttu eggúa fua óibou, tuñí Íbar nam Isáa rakíyo.32 Íba muhán óibou edde Allab Tálar Fua huá zaibou, ar Malik Allaye Íbare Íbar baf Dawudor cíngaccon dibou.
33 Íbaye Yakufor guiccír uore abadulabad hókumot goríbou, Íbar raijjo honódin no fúraibóu.” 34 Hétunot Moriyame fíristáre hoódde, “Yián keéne óibou? Añí dé aijjó abiyáta.”
35 Fíristaye híbare zuab dedde, “Pak Ruú tuáñr uore aibóu, ar Alla Tálar kudurut tuáñr uore sába óibou, hétolla tuáñttu óibou dé hé pak Fuawáre Allar Fua huá zaibou.
36 Soó, tuáñr egana Elízabetóu híbar burá bocót hámil óiye, zibáre báz hoitóu, híbattú ehón só mac soler.
37 Kiyólla-hoilé Allaye gorí no fare dé héndila honó kessú nái.”
38 Hétunot Moriyame hoódde, “Añí Malikor gulam; tuñí zeén hoiyó héen añár uore óuk.” Baade fírista híbar héntu giyégoi.
©REAT
Comments